深坑崁厝傳統工法調查計畫 - 時空旅行社｜國家文化記憶庫線上策展平臺

崁厝

崁厝（khàm-tshù台語發音）技藝源自深坑山區傳統農村建築工法，是修復茅草屋頂的重要技術，至今已有超過百年歷史。林家草厝自清治末期祖先定居以來，便沿用此技藝，代代傳承至今。在蔡金來班長與志工團的協助下，平均每3至4年便須重新修繕，見證了茶山古道上農村互助的人情風景。

牛穴 / 牛靈穴

民間厝宅地理的穴位，適合種作。林家祖先佇炮仔崙種作，欲起徛家厝的時陣，揀牛穴來起厝。牛愛有草佮水，欲佇牛穴起厝，厝頂就愛用草崁，邊仔閣愛有一窟水。林家草厝就按呢維持到今，超過百年。

石水槽仔

林家草厝的石水槽仔，佇灶跤外口，是用規粒大石頭鏨出來的，佇水槽仔墘閣有戮一空細空的通排水。林家草厝起佇牛穴，這个水槽仔就是攢欲予靈牛用的水。林家抾山泉水來貯佇石水槽仔，規年迵天攏愛有水，袂使予焦去。林家相信，水槽仔的水若焦去，牛穴就會無效去。

基礎石 / 地靈公 / 地基主

民間普遍認為，天地萬物攏有靈、攏有神，尤其是欲起厝徛起，一定愛尊敬厝地的神靈。林家草厝佮蔡班長的塗墼厝，佇起厝的時陣，攏有一塊石頭做基礎來定位，佇基礎石的頂懸才設尪架桌祀祖先的神主牌仔。拜祖先的時陣，會先拜這塊基礎石。草厝的基礎石是三角形的，會定期犒軍，祭拜地靈公。塗墼厝的基礎石是四角形的，當做地基主來祭拜。

三點金

崁厝當然愛對起厝開始。林家草厝佮蔡班長的塗墼厝，佇起厝的時，會先𫞼一塊基礎石，這塊基礎石就是厝的坐位。閣來就是看欲面向佗一个方位，對基礎石ǹg彼个方向搝一條線出去。定一點做戶橂，就是決定厝身的深度。閣延伸出去，佇門口埕定一个點。按呢三點連一條線，就號做「三點金」，是起厝真重要的定位線。

主樑；橫樑

厝脊，規个厝頂上懸的所在，嘛是規間厝上大支的樑。林家草厝佮蔡班長的塗墼厝攏是用杉仔做主樑。佮主樑排仝向的樑就叫做橫樑。林家草厝佮蔡班長的塗墼厝嘛是用杉仔做橫樑。

一坪

崁厝工法內底，講著完整的厝頂，就叫做「雙倒水」，若講著雙倒水厝頂的一爿，就叫做一坪。蔡班長講，以早崁厝的跤手有夠的時，一工就會使崁一坪厝頂。毋過這馬欠工欠料，干焦補厝頂的草，一坪厝頂就愛做幾若工。

雙倒水

崁厝工法內底，講著完整的厝頂，就叫做「雙倒水」。因為草厝厝頂是以主樑的所在上懸，掠瀉水的角度，斜向雙爿落去，兩爿攏會當瀉水，這就是「雙倒水」的講法。崁雙倒水的厝頂，是對斜樑方向的骨架開始起底，竹頭向下跤，竹尾佇主樑的所在相扯才閣遏落去。聽候斜竹縛好，才縛橫竹，拍底拍好就會使鋏草。一沿草鋏好，若欲閣iân一沿，就愛重拍底，仝款的工課閣做一遍。林家草厝的厝頂有十沿以上。

茅仔草

茅仔草是崁厝上重要的材料。稻草、菅蓁、魚liù棕攏會當提來崁厝，毋過一兩年就會漚去，若提茅仔草來崁厝頂，會當擋三、五冬。以早炮仔崙規山坪攏有茅草，秋天共茅草割起來曝焦，隔轉年就有夠通崁厝。這馬愈來愈歹揣著茅草，若有欲收茅草，春天就愛去拜託田地的主人專工共留起來，莫澍藥仔嘛莫剷掉。聽候茅草大欉，秋天才有通割。收三冬五冬的量，猶是無夠通崁規个厝頂，干焦會當用補的。

魚liù棕

山棕，棕的一種，佇淺山真捷看著的棕仔樹。棕尾掛葉仔的部份嘛是草厝崁厝頂的材料。深坑、石碇仔佮坪林會叫伊「魚liù棕」抑是「蝦liù棕」，就是提葉仔來做liù魚仔抑是 liù蝦仔的箍仔套。「Liù」這个音，佇《1913甘為霖台語字典》就有記錄；《1932臺日大辭典》有解說：「用環套來掠」，漢字寫做「紐」；《2002⁺台華線頂辭典》：「套捕」，漢字寫做「溜」。毋過目前《教育部臺灣台語常用詞辭典》無收這个詞條，咱遮就先用語音記錄。

棕仔骨

魚liù棕的葉仔柄。共魚liù棕規支葉仔剉落來，棕仔尾剉掉，留中央彼支骨，取欲愛的長度，直直破做幾若爿，才閣剾予薄薄，就真韌，會使提來縛物件。草厝崁厝的時，會用竹仔做楬仔來鋏草，閣用山棕皮來共頂下層的竹楬仔縛做伙、縛予絚，按呢才會當共草仔鋏予牢。

１．菅蓁；２．菅尾；３．菅蓁骨；４．菅芒花

1. 菅芒。草厝崁厝頂，上好的材料是茅草，毋過種茅草上驚拄著菅蓁。菅蓁生湠真緊，發甲真茂閣懸，一下仔就會共茅草崁甲無去。作穡人就共菅蓁割起來，毋過嘛無拍損，規欉攏提來利用。 2. 菅芒的葉仔。以前攏是提來飼牛。嘛是會使提來做崁厝的材料。 3. 菅芒的莖。共菅尾剉掉賰中央彼支骨，會使提來做崁厝的材料。 4. 菅芒的花。菅芒花開過、結子了後，共子敲掉，賰花稿，會使提來縛做掃帚。

溪藤

臺灣黃藤，棕的一種，規欉的莖攏有刺。共莖有刺的外皮削掉，取內骨，就是藤條。共籐條直直破開，破做幾若爿，取藤仔心佮藤仔皮來做縛物件的材料。草厝厝頂結構的杉仔佮竹管攏是用溪藤來縛的，會當縛甲絚tòng-tòng閣穩觸觸。

雙套結

崁厝工法，欲共鋏草的楬仔佮拍底的竹仔縛做伙，抑是欲共明竹暗竹縛做伙，攏愛用著溪藤、棕仔骨抑是麻索仔來縛。縛好愛拍結才會絚，較捷用著的拍結方法就是雙套結。蔡班長用雙套結來縛崁厝的楬仔，為著欲縛閣較絚，伊佇雙套結縛好了後，閣加拍一个平結，確保索仔結袂散去。

吊掛式的縛法

原本崁厝攏佇厝頂作業，愛做雙倒水的厝頂，嘛愛佇厝頂起底、鋪草、鋏草，是真危險的工課。蔡班長為著欲說明崁厝工法，閣愛顧安全，就設計一个菜架仔來做範予逐家看。厝頂咧拍底的時，縛斜樑佮橫樑的固定縛法，蔡班長用吊掛式的縛法來改良。順斜樑行，一節一節共橫樑縛起去，橫樑就袂徙位。若干焦共斜樑佮橫樑縛起來，無加彼條斜樑索，橫樑就較會走去。

明竹、暗竹

崁厝的工法內底，對鋏草的竹仔，有相對的講法。崁厝的時，是對簷口開始崁草，一步一步升起去，崁起去kah厝頂。崁第一沿草仔了後，鋏第一步楬仔，就叫做明竹。閣升起去，崁第二沿草仔的時，進前鋏好的彼步楬仔就會予草崁佇下跤，就變做暗竹。草厝厝頂經過三冬五冬，厝頂的草會溼澹、生青苔、漚去，就愛換草，重崁厝。毋過這馬茅草僫揣，人工嘛歹倩，就無法度換規坪厝頂，干焦會當用補的。欲補厝頂的時，先共漚去的草掃掉，若草尾無去，看著暗竹浮起來（崁佇暗竹頂懸的草攏無去矣，竹仔浮現現），就是愛鋏新草的所在，若無鋏予實，暗竹佮下跤的厝頂結構攏會漚去。

封藤口 / 掠鳥鼠仔步

崁厝工法，是對簷口開始鋪草鋏草，一步一步升起去，崁起去kah厝脊。上懸彼步明竹鋏好縛好了後，佇索仔步外口閣縛一把草，共索仔縫閘起來，按呢防水效果會閣較好（以這號講法替換「按呢較袂漏水」，因為草厝有譴損，無愛聽著「漏水」）。這个步數就叫做「封藤口」，嘛叫做「掠鳥鼠仔步」。

笑槽；匼槽

厝頂崁瓦的工法。瓦是彎弓形的，彎曲彼面向天就叫做笑，共瓦的笑面排做一條抾水的塌槽，就號做笑槽。彎曲彼面向地就叫做匼，共瓦的匼面排做一條瀉水的崙，就號做匼槽。

修灶

草厝百年來攏用大灶咧炒茶，用久來，灶面就崩去矣。蔡班長用石頭來共伊補予好勢，到今猶閣真好用。蔡班長講，修灶愛佇舊曆十二月二四，送灶神了後才會使振動，閣袂使拖傷久影響徛家煮食。蔡班長用兩工的時間共伊修理好。草厝的灶袂使有煙筒管，驚火星飛起去厝頂，干焦有敨氣的空。草厝內底，長期有灶空的煙佮烘茶的燒氣，共塗牆佮天篷攏薰甲烏鉎烏鉎，顛倒有保護的作用。

換工

以早炮仔崙有足濟間草厝，草厝三冬五冬就愛換一改厝頂的草，攏是厝邊隔壁逐家來鬥跤手做伙崁厝。厝主受人幫贊，就會共厝邊鬥紡田、割稻仔抑是挽茶來回報，這就叫做換工。這種換工的制度攏是互相講定，照品照行，無人用白紙烏字寫落來的。換工的約束內底，一隻牛做的工課嘛算是一个人工額。

菜架仔

「炮仔崙假日農民市集」賣菜的所在。本來的菜架仔是用一塊塑膠桌仔，插一支雨傘來遮日頭，按呢爾爾。蔡班長提竹仔，利用崁厝的工法，崁一个一坪厝頂的菜架仔。竹仔戮空鑿榫來鬥起來，才閣用鐵線縛，嘛有用溪藤纏，抑是用麻索仔縛。厝頂是用稻草崁的。規个菜架仔大部份是天然的材料，架仔位闊閣會當遮日擋雨。

石棚土地公

炮仔崙在地居民所祭拜的山神。佇林家草厝後壁無偌遠，茶園的邊仔，有幾若欉樹仔，佇上大欉的彼欉樹仔下跤，用三塊石頭搭一个棚仔，就是祭拜的所在。這是居民對土地的尊敬，嘛祈求平安佮豐收。

火炭窯

炮仔崙茶山古道就是種茶出名的，林家草厝佮蔡班長的塗墼厝，厝身塗牆會喘氣，是烘茶真好的場地。以早欲炒茶、烘茶，攏會用著火炭。茶山本成有火炭炭窯，是蔡班長的阿爸起的，剉相思仔來燒做火炭。毋過這馬攏改用電抑是gá-suh來烘茶，無人咧用火炭，火炭窯久無燒火炭就崩去矣，賰地基爾爾。圖: 蕭文杰/2004年佇三芝翕的火炭窯

iân

動詞，佇一沿一沿、重重疊疊的物件頂懸閣加一沿的動作。草厝崁厝頂的草，佇一沿草崁好了後，若欲閣崁一沿，就用「iân」一沿。蔡班長講：「咱若berh閣iân一沿honnh，愛閣做底。所以講，咧共草厝修理的中間honnh，干焦咧補遮的，愛閣做底，愛閣做這个，buē使直接縛lo̍h，愛閣做一沿底起去，才閣iân起去。」